Nagapatubang na sang kaso nga rape with homicide ang 62 anyos nga suspek nga ginatudlo nga naghimulos kag nagpatay sa 17 anyos nga dalagita sa Purok Masinolondon, Barangay Magsaysay, Cadiz City.
Sa interview sang Bombo Radyo Bacolod kay Police Major Bonifacio Aral, deputy chief of police sang Cadiz City Police Station, nainquest na ang kaso batok kay Federico Delfin, 62 anyos nga suspek sa naglugos kag brutal nga nagpatay sa stepdaughter sang iya bata.
Suno kay Aral, rape with homicide ang kaso nga ginpasaka batok sa suspek bangud supported man ini sang medico legal nga may yara sang nakita nga laceration sa pribado nga parte sang lawas sang dalagita.
Kahapon sang hapon ginhingagaw ginpaidalom sa inquest proceedings ang suspek kag ginpasaka na ang kaso batok diri.
Suno kay Aral madasig lang man mapasaka ang kaso batok sa suspek kun ang pamilya sang biktima ang cooperative.
Nakahunong na sa karun sa Cadiz City Police Station ang suspek kag ginahulat nalang ang commitment order nagikan sa korte antes isaylo sa jail facility sang Bureau of Jail Management and Penology.
