Nasapwan ang bangkay sang isa ka 62-anyos nga madrasta nga nakalubong sa kilid sang suba matapos nga ginpatay sang iya 46-anyos nga manak nga lalaki sa Sitio Paniquion, Barangay Jerusalem, Cadiz City.
Sa interview sang Bombo Radyo Bacolod kay P/Lt. Col. Robert Mansueto, hepe sang Cadiz City Police Station, ginpahayag sini nga mismo ang suspetsado nga si Angelito Sibuyan ang boluntaryo nga nag-ako sa krimen nga iya nahimo.
Suno kay Mansueto, ini man mismo ang nagtudlo kag nagbulig retrieve sa bangkay sang biktima nga si Andiolina Sibuyan.
Nagagwa sa inisyal nga imbestigasyon sang kapulisan nga natabo ang insidente sadto pang Agosto 1, alas-7:00 sang gab-i apang kahapon lang sang hapon natukiban.
Ginapahayag nga na-impito ang suspetsado bangud nga naling-an ini sa baba sang biktima.
Didto na kag nakuga ni Angelito si Andiolina tubtob nga iya ini mapatay.
Dugang pa sang hepe nga gilayon nga nagkutkot sa kilid sang suba nga malapit lamang sa ila puluy-an ang suspetsado kag ginlubong ang biktima.
Suno sa hepe, may yara sang nakakita sa ginhimo nga pagkutkot ni Angelito.
Sa karon, yara sa kustodiya sang Cadiz City Police Station ang suspetsado kag suno kay Mansueto kun magpirma si Angelito sang extra-judicial killing confession, sarang na ini nga mapasakaan sang kaso.
