Aminado ang suspek nga siya ang brutal nga nagpatay sa 17-anyos nga babaye sa Brgy. Magsaysay sa ciudad sang Cadiz,Negros Occidental.
Sa interview sang Bombo Radyo Bacolod kay Federico Delfin, 62 anyos, gin-ako sini nga siya ang nagpatay sa bata apang ginpanginwala sini nga naluyag siya sa bata kag ginhimuslan niya ini.
Suno kay Delfin, wala sini ginasunod-sunod ang bata kundi ginadul-ong lamang niya ini sa eskwelahan bangud concerned siya diri bangud apo na ang pagkabig niya diri.
Suno pa diri, nahimo sini ang krimen bangud nagpanginit na ini sa pagsabat-sabat sang bata sa iya.
Ginpahayag man sini nga nagkalautod ang tudlo sang bata bangud ginsagang sang bata ang iya kamot sang ini ang ginlabo.
Nagpangayo man ini sang patawad sa pamilya sang biktima.
Samtang, ginpahayag sang officer-in-charge sang Cadiz City Police Station nga ulihi nga impormasyon nga nagkuha sini paagi sa gintuad sang suspek kag sa iban nga witness nga antes pa man natabo ang krimen, nagapanglaba ang dalagita kag yara man ang suspek.
Suno kay Plt. Col. John Joel Batusbatusan, sadtong tion man nadula ang bata.
Suno kay Batusbatusan, santo man sa pahayag sang suspek sa bubon man kun sa diin nagpanglaba ang bata niya ini ginlabo gani wala sang makita nga tinulo sang dugo sa crime scene.
Sa imbestigasyon sang mga kapulisan, nautod man ang nawala kag tuo nga kamot sang bata magluwas nga ginlaslas pa ang liog sini.
Nakahunong na sa karun sa Cadiz City Police Station ang suspek.
