Para sa 62nd Infantry Battalion (IB) self defense ang ginhimo sang CAFGU Active Auxiliary (CAA) member amo nga ginpaarakan sini sang luthang ang mag-amay nga hubog nga nag-eskandalo sa Barangay Montilla, sa banwa sang Moises Padilla.
Ang mga biktima nga napatay amo ang mag-amay nga sanday Godofredo Templatura, 70 anyos kag John Albert Templatura, 32 anyos; samtang pilason naman ang duha ka babayi nga nasalabat nga ginkilala nga sanday Marites Rafol, 49 anyos kag Jeisel Abaño, 34 anyos nga isa ka loan officer sa isa ka bangko.
Ang suspetsado ang ginkilala naman nga si CAA Donan Sosia, 32 anyos residente sa Barangay Macagahay sa nasambitan nga banwa.
Sa interview sang Bombo Radyo kay Lt Col William Pesase Jr., commanding officer sang 62nd (IB), nangayo sang bulig ang barangay kag sadto malapit didto ang CAFGU, amo nga ini ang una nila nga ginpalapitan.
Nagresponder lamang ang CAFGU sa posibilidad nga maglala pa gid ang sitwasyon kun ini ang indi nila pagrespondehan.
Suno diri, self defense lang ang ginhimo ni Sosia, amo nga antes pa siya labo-on gintiro na sini si John Albert kag sang nagpalapit naman ang amay, iya man ini nga gintiro antes pa siya maagawan sang armas.
Dugang pa sini, may yara sang huring-huring sa barangay nga may yara sang ginatago nga armas-luthang ang mag-amay.
Pahayag ni Pesase, bisan sin-o man ang yara sa amo nga sitwasyon ang madepensa gid lamang sang iya kaugalingon.
Sa bahin naman sang CAFGU, wala man sang bisan ano nga mga isidente nga imbulbado ini.
