Nagdangat sa 63 ka pamilya ukon 221 ka mga indibidwal ang apektado sa nagluntad nga sunog sa 6th Street, Purok Tangkong, Barangay 7, Bacolod City sang Sabado sang gab-i.
38 ang totally damaged nga mga panimalay kag sa karun temporaryo nga nagatinir sa Barangay Villamonte gym ang mga biktima sang sunog.
Sa interview sang Bombo Radyo Bacolod kay Edelisa Ardel, isa sa nasunogan, nagakatulog ini apang nakibot na lamang si Ardel sa nabatian nga lupok.
Una sini nga ginpatihan nga may yara sang kinagamo ukon pagtinirohay apang siya nakabati sang singgit nga may yara sang sunog.
Wala na sini nasalbar pa ang iya mga kagamitan bangod nga na alang-alang na ini kag nagdalagan na lamang paggwa sa area kaupod ang iya live in partner.
Suno diri, kun may yara sila sang mabaton nga assistance, tinguhaan sini nga makapatindog sang balay.
