64 anyos nga lalaki ang una nga kumpirmado nga kaso sang napatay bangod sa dengue.
Sa interview sang Bombo Radyo Bacolod kay Dr Grace Tan, head sang Environment and Sanitation Division sang Bacolod City Health Office, ang apat ka adlaw na nga nagahilat, naga-ubo, may kabudlayan sa pagginhawa kag nagapalanuka na antes paman ma-admit sa ospital sang Pebrero 3.
Ang pasyente nga residente sang Barangay Alijis ang ginbawian sang kabuhi sang Pebrero 5.
Suno kay Tan, ini nagaserbe nga pahanumdom nga indi lamang kabataan ang mahimo matapikan sang dengue, bangod tanan nga age group, bisan ang mga masakiton ang mahimo kadton sang lamok.
Gani pahanumdom sini nga kun magdangat sa duha ka adlaw ang hilanat mas maayo nga ini ang ipakonsulta na.
Suno diri, indi dapat pinsaron nga ini ang ordinaryo nga trangkaso lamang, bangod bisan ang trangkaso ang may tion man nga may severe effect ilabi na sa mga immuno compromise nga mga pasyente.
Dapat man nga mag-inom sang madamo nga tubig agud indi madehydrate, bangod ang dehydration ang makapadasig sang paglapta sang komplikasyon.
Panawagan ni Tan sa tanan nga mag-upod sa “Alas Kwatro Kontra Mosquito” campaign sang Department of Health.
Panugyan sini nga kada hapon, mas maayo kun magpaninlo sang palibot kag pangitaon ang mga may nagatinir nga tubig nga mahimo itlogan sang lamokkag ini ang i-ula.
Ang CHO upod sa mga Barangay ang naga-address man sang isyu kun sa diin kun may dengue cases sa isa ka lugar, sila ang nagapatigayon sang fogging.
Apang sa kainit sang tiyempo, wala sini ginarekomendar ang fogging kag spraying, kag mas maayo ang environment friendly nga mga tikang.
Halin Enero tubtob Pebrero 2025, ang total dengue cases sa Bacolod City ang nagdangat na sa 180 kag may isa ka fatality.
Ang mga Barangay nga may pinakamataas nga dengue cases ang ginapangunahan sang Brgy Mansilingan nga may 17 ka kaso, Estefania kag Alijis nga lunsay 16, Taculing kag Singcang-Airport nga lunsay 13, Tangub nga 12 kag Villamonte nga 11.
Ang kaso ang may 172.7 percent nga pagsaka kun ipaanggid sa kaso sa kaangay nga period tinalikdan nga tuig, nga may-ara lamang sang 66 ka kaso kag wala sang napatay.
