65-anyos nga mangunguma sa Isabela, patay sa pagpangluthang

Patay ang isa ka 65-anyos nga mangunguma matapos ginluthang sa Purok Santan, Barangay Cansalongon, Isabela, Negros Occidental, alas 4:30 kahapon sang kaagahon.

Sa impormasyon nga nakuha sang Bombo Radyo, padulong na kuntani sa iya ulubrahan si Reynaldo Molines, 65 anyos kag residente sang nasambit nga lugar, sang ini ang gintiro sang wala pa makilal-an nga mga suspetsado.

Nakaangkon ini sang igo sa lawas kag ginhingagaw pa dala sa Isabela District Hospital apang gindeklarar na nga dead on arrival.

Nakuha sa lawas ni Molines ang isa ka fired bullet sang ginapatihan .45 caliber nga armas luthang.

Sa karun nagapadayon ang imbestigasyon sang kapulisan tuhoy sa identity sang mga suspetsado.