BACOLOD CITY-Opisyal na nga ginturn-over sa ciudad sang Bacolod ang Regional Evacuation Center sa Brgy. Vista Alegre kaina sang aga.
Ang inauguration kag turn-over ang ginpanguhan ni Bacolod City Lone District Congressman Greg Gasataya.
Ang 3,000 square meters nga duta ang ginapanag-iyahan sang ciudad samtang ang pondo naman sa pagpatindog ang naghalin sa Department of Public Works and Highways (DPWH).
Ginkompirmar man kaina nga 300 katawo ang sarang nga maakomodar sang duha ka panalgan nga evacuation center kag may yara ini sang kapilya sa idalom kag infirmary nga maka-akomodar sang isa ka gatos ka tawo.
Ang P33 million nga balor sang evacuation center ang may yara sang separado nga banyo para sa mga babayi kag lalaki, may laundry system kag konektado man ini sa linya sang BACIWA kag CENECO.
Magluwas diri, may yara man sang kaugalingon nga power generating system kag water system.
May yara man sang caretaker nga magabantay sa nasambit nga evacuation center samtang indi pa ini magamit.
