Suportado ni Bacolod City Lone District Congressman Greg Gasataya ang tikang sang National Task Force Against COVID-19 nga pagsuspendi sang pagpabalik sang mga locally stranded individuals (LSIs) sa mga probinsya sang Negros Occidental kag Iloilo agud nga matapna ang paglapta sang balatian sa lugar.
Madumduman nga gin-aprobahan ni NTF Chairman and Defense Secretary Delfin Lorenzana ang 14 ka adlaw nga ban sa pagbalik sang mga LSI sa duha ka probinsya, santo sa request sang mga local government officials.
Suno kay Lorenzana, dapat nga maghulat nalang ang mga LSI kag indi na anay magkadto sa mga airport kag seaport, tubtob maghatag na sang pahanugot ang mga LGU sa pagbaton sa ila.
Sa interview sang Bombo Radyo kay Gasataya, nagakompormi ini sa nasambit nga tikang bangud sa nagadamo nga mga positibo nga kaso nga nagasulod sa ciudad.
Suno sa iya, ang desisyon ni Lorenzana ang iya man ginbase sa statistics nga nagapakita sang pagsaka sang numero sang kaso sang COVID-19 sa ciudad kadungan sang pagpauli sang mga LSIs.
Suno kay Gasataya, mas maayo kun iplastar anay ang mga pasilidad bangud kun padayunon ang pagpasulod sa mga ini, kulangon gid ang mga quarantine facilities.
Nagpang-abiso man ini nga magpabilin nga kalmado kag magsunod na lang anay sa desisyon sang gobyerno bangud para man ini sa kamayuhan sang kadam-an.
Nagapati man ang focal person sang Department of Health Region 6 nga maayo ini nga paamagi agud mabuhinan ang mga kaso sang COVID-19 sa kada ciudad kag probinsya.
Suno kay Dr. Renilyn Reyes, padayon nga nagadamo ang mga nagapositibo nga repatriated overseas Filipino workers kag LSIs.
Gindugang man sini nga kun magpadayun balik ang mga ini, indi gid supisyente ang mga pasilidad.
Suno kay Dr. Reyes, isa sa mga ginaduso ang pagpaidalum sa home quarantine kun wala na sang lugar sa mga pasilidad apang kinahanglan nga may prooer monitoring gid sa mga pasyente.
