Nagalaom ang alkalde sang banwa sang Pontevedra, Negros Occidental nga temprano pa mapagwa ang result sang swab test sang mga miyembro sang Municipal Disaster Risk Reduction Management Office (MDRRMO).

Sa interview sang Bombo Radyo kay Mayor Jose Maria Alonso, ginpahayag sini nga ginswab na tanan nga mga responders matapos nga nagpositibo ang isa sa ila.

Ginalauman man sini nga maggwa na tatlo tubtob apat ka adlaw ang resulta sang swab test.

Nagapadayon man ang contact tracing kag ginpangreswab man ang mga negatibo na ang resulta agud masiguro nga indi carrier.

Ginkompirmar man sini nga ginlockdown na ang Purok 2, Barangay 1 kag Brgy. Don Salvador Benedicto, Pontevedra.

Aminado man ini nga ang pagpositibo sang pila ka mga pumuluyo sini ang naghatag sang kakugmat sa mga residente apang ginapaintindi sini nga magkalma lang bangud ang banwa kag probinsya ang nagatinguha nga matapna ang virus.

Nagpanawagan man ini sa mga pumuluyo nga magkooperar, magbuligay kag magpangamuyo nga matapna ang pagpanghalit sang virus.

Indi man matumod suno kay Alonso kun local transmission na ang natabo bangud indi man ini doctor apang mahimo man ini suno sa iya bangud wala sang travel history ang pasyente.

Samtang, gin-athag ni Negros Occidental Provincial Health Officer Dr. Ernell Tumimbang nga indi pa mahambal nga local transmission ang natabo nga pagpositibo sang driver kag empleyado sang Provincial Disaster Risk Reduction Management Office (PDRRMO) nga residente sang Murcia kag responder sang Municipal Disaster Risk Reduction Management Office (MDRRMO) sa banwa sang Pontevedra, Negros Occidental.

Suno kay Tumimbang, ang confirmatory sang local transmission amo ang nagpositibo nga RT-PCR test sang immediate contact sang pasyente nga wala sang travel history kag ginlatnan sang nagapositibo nga may travel history ukon ang community transmission.