Hugot nga ginakondenar sang Commission on Election – Negros Island Region ang natabo nga shooting incident sa brgy Mambulac, ciudad sang Silay, Negros Occidental, subong nga aga.
Kaina sang aga, ginpaarakan sang luthang ang mga volunteers sang Team Ugyon samtang nagamonitor sa Team Asenso headquarters bangod sa report nga vote buying.
Duha ang kumpirmado nga patay samtang lima sang pilason.
Sa inisyal nga report ang isa ka biktima ang ginkilala nga si Rick Ortillano, residente sang Barangay Mambulac, Silay City, samtang ang suspetsado naman ang ginkilala nga si Arnie Benedicto, Punong Brgy sang Brgy Lantad.
Sa interview sang Bombo Radyo kay Atty Jossil Macute, Assistant Regional Director sang Commission on Election – Negros Island Region, nagtuga sang panic sa mga pumuluyo sang Silay ang natabo apang nagpasalig ini nga yara ang Police Regional Office- Negros Island Region kag Philippine Army nga nagasecure sa polling precinct sa area.
Suno diri, indi makaapekto sa pagconduct sang election ang natabo kag nagpanawagan sa mga botante nga maggwa kag magboto.
Suno pa diri, wala sang dapat ikakulba bangod ang shooting incident nagluntad sa gwa sang polling centers kag may yara na sang addtional nga security measures sa ciudad.
Sa karun hugot nga ginabantayan ang area kun diin nagluntad ang shooting incident samtang indi pa masulod ang headquarters apang nakastand by ang kapulisan pananglitan nga kun maaktohan nga may yara sang ginahimo nga nagabayolar sa layi, may otoridad nga makadakop gilayon.
