Patay ang pito ka tuig nga bata samtang pilason naman ang iya iloy kag manghod matapos matumbahan sang puno sang duldol sa Prk Bacus, Brgy Maao, Bago City.
Sa interview sang Bombo Radyo Bacolod kay Punong Barangay Jovito Gahaton, natumbahan sang puno sang duldol ang tatlo ka miyembro sang isa ka pamilya nga ginalakipan sang iloy kag duha ka kabataan.
Napatay ang pito ka tuig nga bata, samtang yara sa karun ginabulong sa ospital ang iloy kag ang manghod sang napatay nga nag-angkon sang samad.
Ang amay ang ginapahayag nga wala naman sa balay bangod nagtrabaho.
Natabo ang insidente kahapon sang aga kadungan sa paglaslas sang Bagyo TINO.
Suno sa Punong Barangay, may naanod man nga balay sa Prk Mabinuligon 1, apang siya ang wala pa makabatun sang detalyado nga report.
Pahayag sini nga nalab-ot sang mabaskog nga daludo sang tubig bisan ang footbridge, gani wala makaluwas sang balay nga yara sa higad sang suba.
Samtang nagdangat sa masobra 1,600 ang evacuees sa amo nga Barangay.
Halin man sang aga nga brown-out sa ciudad kag tubtob sa karun wala pa mabalik ang kuryente, gani sila ang nagakinahanglan gid kuntani sang generator.
Suno kay Gahaton, nagapanguna nga kinahanglan sang mga evacuees ang habol kag banig.
