Padayon nga ginabulong sa ospital sa ciudad sang Bacolod ang pito ka estudyante kag isa ka iloy matapos nga nasamaran kasunod nga madalasa sang isa ka tricycle sa atubang sang Sum-Ag church, Barangay Sum-Ag, Bacolod City.
Sa interview sang Bombo Radyo Bacolod sa isa sa mga nakasaksi, may isa ka tigulang nga nagadala sang tricycle kun sa diin mahimo naglingin ang ulo niya bangud indi man ini hubog kun sa diin nagderecho kag wala nagapreno tubtob nga nabungguan sini ang ginpatabok nga mga estudyante.
Suno sa nakawitness, ginalantaw nga may ginlikawan pa nga mga single nga motorsiklo ang tricycle gani nakaderecho ini sa kilid sang dalan kun sa diin nadalasa sini ang pito ka mag estudyante kag isa ka iloy.
Minor injuries ang naagom sang mga estudyante apang ang isa parent nga nadalahig ang dako ang pilas apang lunsay nadala na sa ospital kag nadapatan na sang nagakaigo nga pagbulong.
Samtang ang driver sang tricycle ang temporaryo nga gindala sa Bacolod Police Station 9 apang ginpanilagan man bangud nakita nagalain man ang pamatyag sini.
Nakadepende na sa traffic investigator kun ano ang kaso nga ipasaka sa driver sang tricycle.
Ang senior citizen nga driver sang tricycle ang nagabiyahe man sa Barangay Sum-Ag kag katapo man sang tricycle drivers operators association sang Barangay.
Ang mga estudyante ang tatlo nga nagikan sa Grade 4 kag apat nga nagikan sa Grade 6.
