Padayon nga nagapaayo sa ospital ang isa sa pito ka mga nagatrabaho sa kampo sang tubo ukon sakada nga gintiro sang blue guard bangud sa away sa duta sa Hacienda Escolastica, Brgy. Mabini, Cadiz City, Negros Occidental kahapon, Setyembre 30.
Ang mga biktima ang ginlakipan nanday Alias Jonathan kag Alias Amalia, 54 anyos; Alias Geraldine, 46 anyos; Alias Lucia kag alias Renilda, 53 anyos; Alias Mary , 57 anyos kag Alias Mary, 44 anyos kag mga residente sang nasambit nga lugar.
Samtang ang ginatudlo nga suspek sa pagtiro sa mga biktima amo sanday Alias Steve,31 anyos, single kag residente sang Sitio Canabawan, Barangay Mabini, Cadiz City; Alias Reylando, 32 anyos, single kag residente sang Hacienda Miriam, Barangay Luna, Cadiz City; Alias Rodelio, 30 anyos, kasado kag residente sang Purok Riverside, Barangay Tabunan, Bago City; Alias Rodel, 38 anyos, single kag residente sang Hacienda Napungolan, Barangay Tortosa, Manapla, Alias Armelo, 53 anyos kag residente sang Barangay Guinhalaran, Silay City, Alias Kenneth, 26 anyos, single kag residente sang Barangay 1, Moises Padilla; kag Alias Rhimboy, 29 anyos, single kag residente sang Barangay Odiong, Moises Padilla.
Sa interview sang Bombo Radyo Bacolod kay Punong Barangay Rosevil Villarin sang Barangay Mabini, pito ang naigo sang nagpalupok ang mga blue guards nga nagabantay sa propedad ni Lyndon Lim.
Isa sa mga ini ang gindala sa ospital sa Manapla bangud sa nakuha nga impormasyon nalab-ot ang tul an sini ang naigo sang bulitas sang shotgun.
Suno kay Villarin ang ginrefer sa ospital ang ginkilala kau Jonathan Escabarte.
Nagapanawagan ang Punong Barangay sa Department of Agrarian Reform kun ano ang mahimo sang mga ini bangud ang mga sugarcane farmers ang nagapahayag nga ila ang duta kag may mga papeles sila nga ginhatag sang ahensya kag inug-award nalang ang duta.
Apang sa karun ang duta ang gincancel ang Certificate of Land Ownership Award ukon ang CLOA.
Ginpahayag man sang Punong Barangay nga ang mga sakada ang nakahambal na sang tinalikdan nga kun wala gihapon sang tikang ang DAR ipanghagbason sang mga ini ang gintanum nga tubo sa duta.
Bangud sini sila ang nagapanawagan sang intervention sang nasambit nga ahensya agud nga malikawan ang pagluntad sang kaangay nga insidente.