Ginkumpirmar sang tagpamaba sang Joint Task Force Negros nga nasaylo na sa Negros Occidental District Jail sa Barangay Tabunan, Bago City ang pito sa 11 ka mga lider sang progresibo nga grupo samtang naka-piyansa naman ang apat sa mga ini sang tinalikdan nga Lunes.
Sa interview sang Bombo Radyo Bacolod kay Army Capt. Cenon Pancito III, iya ginpahayag nga naka-piyansa na sanday John Milton “Butch” Lozande, Anne Krueger, Roberto Lachica kag Danilo Tabura sa kaso nga paglapas sa Republic Act 10591 ukon illegal possesion of firearms.
Samtang, priso sa gihapon sanday Noli Rosales, ang mag-asawa nga Romulo kag Margie Bitoon, Albert kag Karina Dela Cerna, Proseso Dela Cruz kag Cherryl Catalogo nga nagapangatubang sa kaso nga Illegal Possession of Firearms and Explosives.
Suno kay Pancito, wala sang kamatuoran ang ginahambal sang progresibo nga grupo nga maluya ang kaso bangud planted ang mga ebidensya batok sa mga naaresto gani na-abswelto ang iban sa mga ini.
Paathag sang tagpamaba, nagasunod lamang sila sa rule of law kag may due process ang tanan.
Panindugan sini, nagapamatuod lamang nga may yara sang krimen nga natabo bangud nakitaan sang probable cause ang 11.
Samtang, nagapati naman si Bayan Muna chairman Atty. Neri Colmenares nga may yara sang iregularidad sa ginpatigayon nga search warrant sang otoridad.
Suno diri, imposible nga may mga armas kag bomba nga natago sa isa ka public office.
Ginpasiguro naman ni Colmenares nga ila sa gihapon ipakigbato kag depensahan sa korte ang pito nga mga nabilin agud mahilway na.
