Nagdangat sa 70 ang mga drug personalities nga naaresto sang Bacolod City Police Office (BCPO) sa mga anti-drug operation nga ginpatigayon sa bulan sang Marso.
Suno kay BCPO Director P/Col Thomas Joseph Martir, nagdangat sa balor nga P5.396 million ang suspected shabu nga nakumpiskar gikan sa nagkalainlain nga mga operasyon.
May kabug-atun naman nga 793.53 grams ang mga narecover nga suspected shabu kun sa diin ang kada gramo ang nagabalor sang P6,800.
Suno kay Martir ang mga Drug Enforcement Teams sang mga Police Station sa Bacolod kag City Drug Enforcement Unit ang nakapatigayon sang 58 ka mga anti-illegal drugs operation humalin sang Marso 1 tubtob 31, 2022.
Kalakip sa mga 70 nga naaresto ang apat ka mga high value individual (HVI) samtang ang 66 naman ang lunsay mga street level individual (SLI).
Iban sa mga ini ang napasakaan na sang kaso maykaangtanan sa pagbayolar sa Republic Act 9165 ukon Comprehensive Dangerous Drugs Act of 2002.
Samtang sa bulan naman sang Pebrero, ang BCPO ang nakakumpiskar sang 316.25 grams sang shabu nga nagabalor P2.15 million kag sang Enero ang mga kapulisan ang nakarecover sang 3,219 grams sang shabu nga nagabalor sang P21.9 million.
Suno kay Martir, magapadayun sa pagtrabaho ang mga kapulisan agud nga mapunggan ang pagsulod sang iligal nga droga sa syudad.
Ini bangod luyag sang mga ini nga mangin malinong ang kabuhi sang mga Bacolodnon sa syudad.
Gindayaw man sini ang pagtrabaho sang mga kapulisan kag nagpahanumdom nga maghatag pa sang dugang nga effort sa pagtuman sang mandato batok sa iligal nga droga.
