70 ka mga Negrosanon nga locally stranded individuals (LSIs) kag yara karon sa Libingan ng mga Bayani sa Metro Manila ang natalana nga mag-abot subong nga adlaw, Setyembre 21 ukon bwas, Setyembre 22, 2020.
Madumduman nga sang nagligad nga semana, 264 ka mga LSIs ang nakapauli na sa Negros Occidental matapos magpagwa sang Resolution No. 71 ang Inter-Agency Task Force nga sarang na makapauli ang mga taga-Negros Occidental bangud ginbatak na ang moratorium sa LSI trips apang wala nalakip ang Bacolod nga yara sa idalom sang MECQ tubtub Setyembre 30.
Sa interview sang Bombo Radyo Bacolod kay Negros Occidental Governor Eugenio Jose “Bong” Lacson, ginpahayag sini nga ‘manageable’ ang kadamuon sang mga LSIs nga natalana nga mag-abot subong nga adlaw ukon bwas.
Nagapasalamat man ini sa mga local government units (LGUs) nga nagapangita gid sang paagi agud maatinder ang ila mga residente.
Samtang, ginkumpirmar naman ni Lacson nga sarang na maka-log in ang kada alkalde sa mga banwa kag ciudad sa Negros Occidental subong man ang mga health offices sang mga ini sa monitoring system sang Department of Health agud ma-monitor ang ila mga pumuluyo kun positibo ini ukon negatibo sa COVID-19.
Suno sa gobernador, mas napahapos ang pagmonitor sang kada LGU bangud nga indi na sila kinahanglan pa nga maghulat nga pahibaluon sang Provincial Health Office (PHO).
