Ginpahayag sang alkalde sang ciudad sang Bacolod nga kapin sa 70,000 ka set sang mga school supplies ang ginpreparar nga ipanagtag sa mga public schools bangod sa ginalauman nga may yara pa sang mga late enrollees.
Ang pagahatagan sang libre nga school supplies amo ang mga kindergarten tubtob sa Grade 1 to Grade 6 students sa public schools sa ciudad.
Kahapon, nagpatigayon sang kick-off ceremony sa pagpanagtag sang libre nga school supplies sa Rizal Elementary School kag ang masunod nga hatagan amo ang Education and Training Center School 1, 2 kag 3.
Suno kay Bacolod City Mayor Alfredo ‘Albee’ Benitez, kapin sa 65,000 ka mga estudyante ang officially enrolled apang kapin sa 70,000 ka mga school supplies ang ila ginpreparar bangod nga posible may madugang pa nga mga estudyante.
Ang school supplies nga mabatun sang kabataan ang ginalakipan sang plastic envelope, notebooks, papel, lapis, ballpen, crayons kag ruler kag mismo ang Department of Education (DepEd) ang nagpili sang malakip sa ipanghatag nga school supplies.
