Nadulaan sang P70,000 nga kwarta ang isa ka Overseas Filipino Worker nga taga-Dumaguete City, Negros Oriental matapos nga nabiktima sang basag-kotse ang tourist van nga ila ginsakyan sang nag-overnight ini sa inn sa Lacson Sreet, Bacolod City, sang Martes sang gab-i.
Ang biktima ang ginkilala nga si Diovanni Curt Cinco, residente sang Dumaguete City, Negros Oriental kag nagatrabaho bilang OFW sa Dubai.
Sa interview sang Bombo Radyo Bacolod kay Police Major Elmer Bonilla, station commander sang Bacolod Police Station 1, nagikan ang biktima sa Boracay kaupod ang iya pamilya kag magapauli na kuntani sa Dumaguete, apang bangod nga gab-i na sang nakab-abot ang pamilya sa Bacolod City, nagdesisyon ang mga ini nga magtulog na lamang sa inn.
Nagcheck-in ang pamilya sa Tamera Plaza Inn sa dalan Lacson, samtang nakapark naman ang tourist van sa gwa.
Suno sa biktima, nabilin sini ang iya bag sa van bangod sa tuman nga kakapoy sa byahe.
Pagkaaga na lamang sang nakita nga buka na ang bintana sang van kag wala na ang bag sang biktima nga may unod nga mga ID’s kag kwarta nga kapin sa P70,000.
Wala naman sang security guard ang inn kag CCTV camera sa area.
