Tuyo sang syudad sang Bacolod nga malab-ot ang bisan 70 porsyento nalang sang populasyon nga mabakunahan na antes matapos ang tuig.
Suno kay Em Legaspi Ang, Executive Director sang Bacolod Emergency Operation Center (EOC), ginalauman sang mga ini nga magataas pa ang porsyento sang mabakunahan ilabi na nga magalunsyar na sa Oktobre 29 sang pediatric vaccination.
Ang Pediatric A-3 category amo ang mga naga-edad 12 tubtob 17 anyos nga may comorbidities kaangay sang mga may asthma, Pediatric Cancer, tuberculosis, HVI kag iban pa.
Ang mga ini pagahatagan sang prayoridad sa initial launching santo sa meeting nga ginpatigayon kahapon upod ang Department of Health (DOH).
Ang Launching sang Pediatric Vaccination ang pagabuhaton sa Oktobre 29 sa Riverside Medical Center.
Madumduman nga ang pilot vaccination sang sektor ang una naman nga ginpatigayon sa Metro Manila, kag ini ang hospital-based lamang.
Ang mga nasambit nga indibidwal nga kwalipikado ang mahimo na nga marehistro agud malakip sa mgha prayoridad sa pagbakuna.
Suno kay Ang, may tatlo ka vaccination group nga iga-assign para sa pagbakuna sa mga Pediatric A-3 categories.
Pagasuguran na ang pediatric vaccination sa Nobyembre 5 sa mga 12 tubtob 17 anyos nga pamatan-on sa tion nga ipapanaog na ang guidelines.
Pasalig sang EOC nga nakahanda na ang mga ini kag nakaplastar na ang logistics nga pagagamitun.
Magluwas sa Riverside Medical Center, magakoordinar man ang Bacolod EOC sa iban pa nga mga ospital nga sarang mapatigayunan sang pediatric vaccination.
