Nagdangat na sa 70 porsyento ang narelease nga Health Emergency Allowance sang mga health workers nga nagserbe sang COVID-19 pandemic sa ciudad sang Bacolod.
Santo sa pahayag ni Fred Grande, in-charge sa HEA sa Bacolod City, P83 million ang budget sang HEA para sa ciudad kun sa diin napanagtag na ang iban kag P30 million nalang ang natalana nga irelease.
Suno kay Grande nadugayan ang pagrelease bangud kinahanglan nga siguruhon nga kumpleto kag wala sang sala ang mga dokumento nga kinahanglan ipasa sa ciudad agud mas madasig ang releasing sang kwarta.
Wala pa sa karun sang final nga applicants apang gin-athag sang Bacolod City Health Office nga ang Department of Health ang naga-allocate sang kantidad kun pila ang mabaton sang mga frontliners nga nagserbe sa ciudad sa tion sang pandemic.
Ang proseso sa pagrelease sang kwarta ang maidid kag kinahanglan nga sundon ang nagakaigo nga proseso agud marelease gilayon ang kwarta.
Ang mga nakabaton sang HEA ang ginalakipan sang high risks ukon ang mga nangin frontliners kag low risks ukon ang nagtrabaho sang mga administrative tasks sa tion sang pandemya.
Suno pa kay Grande, masobra naman sa isa ka libo ang nag-apelar, kag ginatinguhaan sang mga ini nga iproseso agud nga mahatagan sang budget para sa madason nga pay-out.
Gin-athag man ni Grande nga ang budget ang yara sa ciudad samtang ang CHO amo ang naga-asikaso sang mga kinahanglanon agud nga marelease sa labing madali nga panahon.
