12 ka Barangay sa ciudad sang Bacolod ang naka-eksperyensya sang pagbaha bangod sa mabaskog nga ulan kagab-i.
Sa interview sang Bombo Radyo Bacolod kay Earl Edward Ramirez, operations chief sang Bacolod City Disaster Risk Reduction and Management Office, ang mga ginbaha ang ginlakipan sang Barangay 1, 3, 9, 12, 17, 20, Banago, Mandalagan, Montevista, Singcang-Airport, Taculing, kag Villamonte.
Suno kay Ramirez, una sila nakabatun sang tawag sang nagapangayo sang rescue alas-8:30 sang gab-i.
Pahayag sini nga wala sang heavy rainfall warning kahapon, apang may nakita nga madamol nga rainclouds.
Kalabanan naman sang apektado ang bahin sang Northern Bacolod.
Sila ang may ginrespondihan man nga natumba nga poste sang kuryente.
Suno kay Ramirez, may 52 ka indibidwal sila nga gin-evacuate gikan sa Barangay Banago kag ginpahamtang sa Domingo Lacson National High School, apang tanan ang nagpauli man sang kaagahon.
May 78 man nga nag-evacuate gikan sa Barangay Villamonte.
Ginpadulungan man nila ang Purok Carvic sa Barangay Mandalagan, apang apisar sa makusog nga daludo sang tubig, wala sang pumuluyo nga nag-vacuate.
Suno sa mga ini, naanad na sila nga ginabaha sa tion sang madamol nga ulan.
May apat naman ka indibidwal nga nag-evacuate sa Barangay Hall sang Brgy Taculing.
Ginapakamaayo naman ni Ramirez nga madasig nga nagsubside ang baha kag wala sang may narecord nga injuries ukon napatay. SAMTANG…nangin masako ang rescue operations nga ginpatigayon sang Bacolod City Fire Station sa mga nabahaan kagab-i.
Sa interview sang Bombo Radyo Bacolod kay Fire Superintendent Jenny Mae Masip, Fire Marshal sang Bacolod City Fire Station, sila ang nakarescue sang isa ka pamilya nga may lima ka miyembro sa Purok Malinong, Brgy. Taculing, isa man ka pamilya nga may apat ka miyembro sa Prk Hervabuena, Brgy. Villamonte kag tatlo ka pamilya ukon siyam ka indibidwal gikan naman sa Purok Tuburan, Brgy Mandalagan.
Suno kay Masip, sa Prk Carvic, Brgy Mandalagan ang pinakamadamo nga fire personnel nga gindeplpy bangod sa tubtob sa hawak nga baha kag makusog nga current sang tubig, sila ang nagtakod na lamang sang kalat ukon lifeline nga makabitan sang mga pumuluyo nga kinahanglan magtabok.
Sa pihak sang malala nga baha, wala naman sang nag-evacuate gikan sa Prk Carvic.
Sa masami, lima tubtob anom ka personnel ang ulupod sa isa ka deployment, apang bangod sa malala nga baha sa Prk Carvic, sila ang nagpadala sang 14 ka fire personnel kag tatlo ka volunteers.
Pahanumdom ni Masip sa mga pumuluyo nga sa kaangay nga sitwasyon, indi na dapat hulaton pa nga magsaka ang tubig antes mag-evacuate bangod sa tion nga matrap sa tubig-baha, bisan ang mga responders ang nagarisgo man sang kabuhi.
