Ginpakigbahin sang Executive Director sa Emergency Operation Center sa syudad sang Bacolod nga liwat nagpositibo sa RT-PCR test ang 71 anyos nga lalaki sa Barangay Banago nga amo ang pinakauna nga kaso sang COVID-19 Delta variant sa syudad.
Suno kay Bacolod City Administrator Em Ang, bilang kabahin sang protocol sang Department of Health, kinahanglan gihapon ipaidalum sa swab testing ang mga identified ukon nadetect nga variant sang COVID-19, ilabi na Delta variant, bisan natapos na ang mga ini sa 14-days isolation, antes ang mga ini makunsiderar nga recovered na sa virus.
Kadungan sa pag-anunsyar sang Department of Health nga may duha na ka kaso sang Delta variant sa Bacolod City, nga ginalakipan sang 71 anyos sa Barangay Banago kag sang 32 anyos nga nagabusong sa Barangay Sum-Ag, ginpaidalum naman sa reswabbing ang duha sang Biyernes kadungan sa 22 tanan nga mga nalakip sa close contacts.
Naggwa sa resulta sang RT-PCR test nga liwat nga nagapabilin nga positibo sa COVID-19 ang patient number 1 gikan sa Barangay Banago.
Suno kay Ang, ginpasalig sang mga infectious disease specialist nga kun masobra na sa isa ka bulan nga nagapabilin ang COVID-19 sa isa ka persona, indi na ini sarang makalatun pa sa iban.
Dugang pa sang City Administrator nga indi naman ini kinahanglan ni ipaidalum sa isolation, apang ginpakamaayo nalang sang EOC nga ipanugyan ang estrikto nga home quarantine sa dugang nga 14 ka adlaw.
Samtang nagpositibo naman ang duha ka kabataan sang 32 anyos nga patient number 2 sa Barangay Sum-Ag, kasubong man ang kaingod balay sini.
Makabig naman nga isolated cases ang pagpositibo sang duha sini ka mga kabataan kag sang kaingod balay bangod Hulyo pa sang nagpositibo ang iloy.
Suno kay Ang, wala man ginpadala para sa genome sequencing ang mga specimen bangod mas mataas ang mga ini sa 30 cycle threshold.
Paathag ni Ang nga ang ginapadala lang sa Philippine Genome Center para sa Genome Sequencing amo ang mga specimen nga may manubo sa 30 ang cycle threshold.
Ang iban nga mga ginpaidalum sa swab test kag nagnegatibo ang hilway naman sa paggehu.
Naghatag naman sang instruction si Bacolod City Mayor Evelio “Bing” Leonardia sa EOC nga I-extend ang swab testing tubtob sa 3rd generation contact sang mga nagpositibo sa Delta variant.
Nagapabilin naman nga nagapatigayon sang close monitoring ang mga Barangay kag ang EOC sa posibilidad sang paglapta sang Delta variant sang COVID-19 sa syudad.
