Patay ang isa ka lalaki matapos maglumpat sa Taytay Abad sa Brgy Singcang Airport, Bacolod City kapin alas-6:30 kaina sang aga.
Sa interview sang Bombo Radyo Bacolod kay Jessie Nadera, residente sa Prk. Malinong, Brgy. 40, Bacolod City, nagapangape sila sa idalom nga bahin sang taytay sang hinali nalang nga may nagtamsak sa suba.
Nagpinsar pa ini nga may ginhaboy nga basura, apang nakita niya nga tawo ang yara sa tubig.
Suno diri, wala gilayon nalumos ang lalaki, sa baylo ini ang naglangoy kag nagsalom-salom pa.
Apang sa ulihi, ini ang wala na nakabutwa.
Wala naman sila sang cellphone gani wala gilayon nakapanawag sang rescue.
Sila ang nakacontact lamang sa Bacolod City Disaster Risk Reduction and Management Office sang may lalaki nga naglabay nga amo ang ila ginhulaman sang cellphone.
Samtang sa interview sang Bombo Radyo Bacolod kay Police Captain Patrick Pol Lacandula, officer in charge sang Bacolod Police Station 8, wala na sang kabuhi sang maabtan sang rescuers ang biktima.
Ini ang ginalantaw nga nalumos, bangod suno sa nakakita, nagsalom-salom pa ini matapos maglumpat sa taytay.
Abiso na lamang sini sa mga pumuluyo nga kun may masaksihan nga kaangay nga insidente, magreport nalang gilayon sa otoridad.
