Arestado ang isa ka senior citizen matapos nga naaktuhan nga illegal nga naga-refill sang butane canisters kasunod sang operasyon nga ginpatigayon sang Bacolod City Police Office-Intelligence Unit (CIU) kag Bacolod City Police Station 3 sa Purok Riverside, Barangay Banago, Bacolod City alas 2:43 kahapon sang hapon, Agosto 31.
Ginkilala ang nadakpan nga si alyas Milo, 72 anyos kag residente sang nasambit nga lugar.
Sa interview sang Bombo Radyo Bacolod kay Police Lt. Rhanie Songaling, team leader sang Bacolod City Police Office-Intelligence Unit (CIU), may nabaton sila nga impormasyon nagikan sa kumpaniya nga REGASCO, ang legal nga naga-negosyo sang butane, nga si alyas Milo ang duha na katuig na nga ilegal nga naga-refill sang butane.
Suno kay Songaling, matapos nga makuha ang impormasyon gilayon sila nagpatigayon sang surveillance kag monitoring tubtob nga nakumpirmar nila ang report rason nga nagpatigayon sang operasyon.
Suno diri indi lamang delikado sa posibilidad nga makatuga sang sunog ang operasyon ni Milo kundi mahimo man ini nga makatuga sang malain sa ikaayong lawas sang mga pumuluyo sa lugar ilabi na sa mga kabataan kag mga tigulang.
Nakita man sa monitoring sang intelligence unit nga ang suspect amo ang nagasuplay sang butane sa Barangay.
Nadakpan ang suspetsado nga aktwal nga nagabaligya sang petroleum products.
Narekober sa operasyon ang nagkalain-lain nga items nga ginabanta nagabalor sang P90,000.
Narekober man ang isa ka digital weighing scale, tatlo ka filled nga 50-kilogram LPG cylinders, isa ka improvised refiller, kag dose ka filled nga 50-kilogram LPG cylinders.
Dugang pa sa recoveries amo ang anum ka sako sang filled assorted butane canisters, tatlo ka sako sang empty butane canisters, kag siyam ka crates sang filled assorted butane canisters.
Ang suspetsado yara na subong sa kustodiya sang Bacolod Police Station 3 para sa nagakaigo nga disposition kag pagproseso sang kaso.
Suno kay Songaling ang operasyon amo ang pagpatuman sang kasuguan batok sa ilegal nga pag-refill kag pagbaligya sang LPG kag petroleum products sa Bacolod City.
Pasakaan naman sang kaso sang REGASCO ang senior citizen.
