Patay ang 72 anyos nga lalaki matapos mabungguan sang salakyan sa Araneta Highway, Bangga Aning, Barangay Pahanocoy, Bacolod City alas-2:30 sang hapon sang Huwebes.
Ang biktima ang ginkilala nga si Heber Macalua, 72 anyos, residente sa nasambitan nga barangay samtang ang suspetsado ang ginkilala naman nga si Maria Carmila Sanchez, 67 anyos kag residente sa 41 South Bay Drive, South Bay Gardens, West Service Road, Paranaque City.
Sa interview sang Bombo Radyo Bacolod kay P/Lt Capt Glenn Montaño, station commander sang Bacolod Police Station 8, ang biktima ang nagatabok sa dalan sang hinali na lamang ini nabungguan sang Suzuki Jimny nga nagabyahe gikan sa sur padulong sa norte nga dereksyon.
Ginpahayag naman sang driver sa kapulisan nga wala sini nakit-an ang nagatabok nga biktima ilabi na nga medyo madasig ang iya nga pagpadalagan.
Bangod sa impact, ang biktima ang nagbunggo pa sa windshield sang salakyan antes naglabog.
Gintinguhaan pa ini nga madala sa South Bacolod General Hospital agud mabulong, apang ini ang nadulaan sang kabuhi.
Sa pihak nga bahin, nahibaluan nga ginatugyanan naman ang biktima sang iya nga mga pamilya nga indi magsegi gwa bangod ini ang may-edad na.
Apang apisar nga mahinay na kun maglakat ang 72 anyos nga senior citizen, ini ang nagagwa gihapon bangod masami ini nga nagapangsi-od sang mga pispis sa bakante nga lotte sa Bangga Aning.
Aminado naman si Montaño nga wala sang pedestrian lane sa gintabukan sang biktima.
Nagpromisa naman ang driver nga ini ang magabayad sa hospital bills sang biktima kasubong man sa pagpalubong diri kag ini nakapatigayon ang may initial settlement na sa pamilya sang napatay nga senior citizen.
