Patay ang 72 anyos nga tigulang nga babayi matapos mabungguan sang motorsiklo sa Barangay Zone 8, Talisay City, Negros Occidental kaina sang aga kun sa diin nasamaran man ang motorcycle rider.
Sa interview sang Bombo Radyo kay Police Staff Sergeant Jade Dela Cruz, traffic investigator sang Talisay City Police Station, ginkilala ang biktima kay Gloria Guanzon, 72 anyos, kasado kag residente sang Miramar Subd. Brgy. Zone 15, Talisay City, Negros Occidental.
Santo sa pahayag sang mga bata nga nakakita sa aksidente, nagatabok sa dalan ang tigulang kag wala ini nagabalikid sa iya wala kag tuo gani nabungguan sang motorsiklo nga ginamaneho ni Arnel Guadalupe, 38 anyos, kasado kag residente sang Hacienda Lumbia 2, Brgy. Alicante, EB Magalona, Negros Occidental.
Gintinguhaan pa sang suspetsado nga likawan si Guanzon apang sa lugar man nga ginlikawan sini nagkadto ang biktima.
Ginhingagaw pa dala sa City Health Office sang Talisay ang biktima apang gindeklarar nga patay.
Samtang padayon man nga ginabulong sa Corazon Locsin Montelibano Memorial Regional Hospital (CLMMRH) si Guadalupe matapos makaagom sang samad sa pila ka bahin sang lawas bangud natumba man ini.
Ang motorsiklo ang gin-impound na sang Talisay City Police Station.
