72 ka mga atleta gikan sa Bacolod City ang kabahin sa delegasyon sang Western Visayas sa Palarong Pambansa 2025.
Sa interview sang Bombo Radyo Bacolod kay Department of Education division of Bacolod City public information officer Lila Vaflor Arro, sa 199 ka mga atleta gikan sa Negros Occidental nga kabahin sa delegasyon sang Western Visayas, 72 diri ang gikan sa Bacolod City ukon 102 kun kaupod ang mga coaches.
Suno diri, 520 ang mga atleta sang Western Visayas sa mga medal events samtang 613 tanan kun lakip ang demo sports gikan na sa 12 ka DepEd division.
Pahayag sini nga ang Bacolod City ang may partisipante sa Athletics, Taekwondo, Singing, Gymnastics, Swimming, Softball. Archery, selection sa Volleyball, selection sa Basketball elementary kag selection sa Chess.
Ginpasalig man sin nga sila ang nagaprovide sang allowances para sa training kag mismo sa hampang sang mga kabataan, kasubong man allowances sa mga coaching staff kag local trainers.
Makasalig naman ang mga ginikanan nga mabantayan ang medical health sang mga atleta bangod may naka-assign nga tatlo ka dotor sa ila billeting school sa San Nicholas National High School.
Apang sa pihak sini, ang DepEd-Bacolod ang nagpadala man sang isa ka nurse agud may makatutok gid sa medical health sang Bacolod athletes ilabi na nga tuman ka init sang tiyempo.
Suno kay Arro, isa sa ginatarget nga makahakot sang medalya ang athletics.
