Nadugangan sang 54 ang numero sang mga nagpositibo sa coronavirus disease 2019 sa probinsya sang Negros Occidental samtang 18 naman sa ciudad sang Bacolod kahapon.
Santo sa COVID-19 Regional Case Bulletin No. 129 sang DOH Region 6, sa 18 ka mga nagpositibo sa ciudad sang Bacolod, duwa diri ang indigenous cases samtang 16 naman ang returning overseas Filipino workers (OFWs).
May yara na karon sang kabug-usan nga 529 COVID-19 cases sa Negros Occidental samtang 286 naman sa ciudad sang Bacolod nga ginalakipan sang 210 active cases, 69 ang nakarecover kag pito ang nagtaliwan.
Ang nagdugang kahapon sa Negros Occidental ang ginalakipan sang locally stranded individuals kag returning OFWs kag wala sang indigenous cases.
Samtang, kabug-usan nga 129 ang nagdugang sa bag-o nga mga kaso sang COVID sa Western Visayas kahapon gani nagdangat na sa 1,547 ang kabug-usan nga kaso sa rehiyon.
Sa kabug-usan nga numero, 788 diri ang active cases, 738 ang mga nakarecover matapos madugangan sang 32 kahapon samtang nagdangat naman sa 21 ang nagtaliwan sa pagdugang sang isa.
