Nag-abot kagab-i ang 74 ka mga badjao nagikan sa Dumangas sang sila ginpabyahe pabalik diri sa ciudad sang Bacolod.
Kapin alas 6:50 kagab-i nag-abot sa BREDCO Port ang mga badjao.
Sila ginsakay sa duha ka canter truck sang Department of Social Services and Development (DSSD).
Ang mga badjao natalana nga ibyahe sang Ceres padulong sa Dumaguete kag itransport padulong sa Zamboanga.
Hunyo 21, nakabaton ang Bacolod City Anti-Mendicancy Task Force sang reklamo nagikan sa security guard sang warehouse sa Bacolod Reclamation Area may kaangtanan sa presensya sang mga badjao sa lugar.
Bangud sini, gin-istorya sang task force ang 80 ka mga persona sa lugar.
Pagkatapos sang interview kag evaluation sang Department of Social Services and Development, majority sang mga pamilya ang naghingyo nga sila ang papaulion sa ila lugar.
Ginpapauli ang mga badjao padulong kun tani sa Mindanao apang nanaog kag nagtinir ang mga ini sa Iloilo City.
Ini ang ginkainit sang alkalde sang ciudad sang Iloilo kag gintipon ang mga badjao kag ginpabyahe pabalik sa Bacolod City kagab-i.
