BACOLOD CITY — Ginalantaw sang isa ka pulis nga aktibo pa sa serbisyo nga disbentaha para sa gobyerno kun himuon nga 75 ang retirement age sang mga uniformed personnel.
Sa graduation rites sang Philippine National Police Academy, Miyerkules sang hapon, ginpahayag ni Presidente Rodrigo Duterte nga luyag niya nga pataason sa 75 ang retirement age nagikan sa 56 nga mandatory retirement age sa karon.
Suno kay Police Superintendent Adonis Rosales, hepe sang Talisay City Police Station, maluya na ang isa ka pulis nga indi physically-fit kun maglab-ot ini sa edad nga 75.
Bangud sini, mangin dako ang kapierdihan sang gobyerno bangud magasweldo ini sa empleyado nga indi naman epektibo sa trabaho.
Ginkumpormehan naman ini ni retired Police Superintendent Armando Tubongbanua.
Suno sa anay deputy city director for operations sang Bacolod City Police Office, kinahanglan sang pungsod ang mapagsik nga pulis.
Kun indi na makatrabaho ang pulis apang ginaswelduhan gihapon suno kay Tubongbanua, pierde ang gobyerno.
Nagapati ang commander sang 303rd Infantry Brigade sang Philippine Army nga 60 anyos ang ideal nga retirement age sang mga suldado kag iban pa nga uniformed personnel.
Suno kay Brigadier General Eliezer Losañes, dako ang investment sang gobyerno sa training sang mga uniformed personnel gani dapat lang nga ma-maximize sini ang resources.
Ang Armed Forces of the Philippines ang may yara sang provision nga sarang sila maka-avail sang optional retirement kun nakaserbisyo na ini sang 20 ka tuig.
Ginalantaw ni Losañes nga magatinir nalang sa opisina ang isa ka uniformed personnel nga mataas na ang ranggo kag indi na kinahanglan nga magsabak sa physical activities.
Apang nagapati ini nga 60-anyos ang ideal ang retirement age.
Si Losañes ang may yara sang 15 ka adlaw nga pahuway sa kada tatlo ka bulan apang kun kaisa, ginapalip-utan niya ini.
