Pormal na nga ginturn-over sa city government sang Bacolod ang duha ka quarantine and isolation facilities nga ginpatukod sang Department of Public Works and Highways para sa mga pumuluyo nga natapikan sang coronavirus.
Ini ang ginalakipan sang duha ka isolation units nga may 32 rooms sa Barangay Alijis kag ang 45 rooms sa ginrenovate nga evacuation center sa Barangay Vista Alegre.
Suno kay DPWH Region 6 Director Lea Delfinado, P12.5 million ang balor sang kada unit sa Alijis kag ini ang ginpatindog sang ahensya matapos maghingyo si Mayor Evelio Leonardia kag Congressman Greg Gasataya kay Secretary Mark Villar.
Ang kada room ang may comfort room kag may nurse station sa kada unit.
Ang units sa Alijis ang nagatindog sa 2.2 hectares nga lote sang city government nga ginbakal sang tuig 1995.
Suno kay Bacolod City Councilor Renecito Novero, chairman sang Quarantine Centers Action Team, 64 beds na ang kabug-usan nga yara sa Alijis bangud 32 rooms man ang una nga ginturn-over sa ciudad.
Ang isolation facilities ang ginhingyo sa DPWH sang madamo ang COVID cases sa ciudad kag nahuman ini subong nga diutay nalang ang kaso.
Apang sarang man ini nga magamit sa iban nga kabangdanan, ang importante handa sa posible nga liwat nga pagdamo sang kinahanglan i-isolate.
Sa idalom sang memorandum of agreement sa tunga sang DPWH kag sang city government, ang budget ang nagikan sa ahensya samtang ang maintenance naman ang responsibilidad sang ciudad.
