Ginklaro sang acting general manager sang Central Negros Electric Cooperative nga wala sang dapat nga ikabalaka nga may yara sang pagsaka sa bayad sang kuryente kun madayon ang Joint Venture Agreement sa tunga sang CENECO kag Prime Electric Holdings Inc. bangod tinutuyo sang JVA nga mapanubo ang system loss kag ini makatuga sang pagnubo sa rate sang kuryente.
Sa interview sang Bombo Radyo kay Atty Arnel Lapore, natapos ang una nga duha ka adlaw sang pagboto sa plebisito humalin sang Sabado tubtob kahapon.
Suno diri, manubo ang numero sang mga botante bangod sa okasyon sang Sabado nga kapiyestahan San Juan De Bautista kasubong man nga nangin mainulanon ang tiyempo, apang ginalauman sini nga magdamo ang magaboto sa dason nga Hulyo 1, 2, 8 kag 9.
Gin-ingganyo sini ang mga konsumedor nga magpartisipar sa pagboto kun sa diin importante diri ang ila desisyon para sa bwas damlag sang kooperatiba.
Liwat sini nga ginpahayag nga ang pagsulod sang JVA isa ka tikang para mapatahum ang CENECO humalin sa imprastraktura, pag-ilis sang daan nga transformers kag linya sang kuryente kag pag-eliminar sang brownout.
Pa-athag ni Lapore ang pagbrown-out nga nagakatabo amo kapierdehan para sa Ceneco, bangod wala ini sang makolekta kay wala man ini naghatag sang kuryente.
Ginklaro man sini nga wala sang dapat nga ikabalaka ang mga konsumedor bangod bitbit sang JVA ang pagpanubo sang system loss nga makapanubo sa rate sang kuryente.
Ginpakigbahin sini nga nagadangat sa P20 million kada bulan ang system loss sa CENECO nga indi na matatapan amo nga nagakalugdang ang sistema.
Apang ang 5 percent nga system loss nga pasalig kun matuman ang JVA, suno kay Lapore ini makapamag-an sa mga konsumedor.
Sang Hunyo 24, 17,335 ang nakaboto kun sa diin 13,587 ang nagboto sang Yes kag 3,784 ang nagboto sa No.
Samtang sang Hunyo 25 naman, 10,406 ang nagboto, 8,087 ang nagpabor sa JVA kag 2,319 ang nagboto nga nagapamatok.
