Ginpanindugan sang 79 Infantry Battalion sang Philippine Army nga indi nila spy kag asset sanday Jerome Seballos kag Alex Cunanan.
Madumduman nga gin-ako sang New People’s Army (NPA) ang pagpatay kay Seballos kag Canunan sa Sitio Cinco, Barangay Gawahon, Victorias City, Negros Occidental sang Biyernes, Hulyo 10.
Sa interview sang Bombo Radyo kay Captain Paulo Lagarde, Civil Military Officer sang 79IB, ginpahayag sini nga indi nila kilala kag wala nila na-istorya si Seballos.
Dugang pa, wala man sa ila daan nga record ang pangalan sini.
Paathag ni Lagarde nga wala sila sang bisan ano nga impormasyon tuhoy kay Seballos kag nakilala lang nila ini sang nadakpan na sa Talisay City matapos makapalagyo sa nagluntad nga engkwentro sa banwa sang Toboso kun sa diin 19 ang nagkalapatay.
Lantawon pa sini sa bag-o nga record kun yara si Seballos sa listahan sang ila mga intel.
Suno kay Legarde, si Canunan ang iya na-istorya sadto sang siya ang nagkadto sa poultry farm sini.
Pahayag sini, grupo sa gihapon ni Arnel Tapang ang may kahimuan sa nasambit nga krimen kag ini ang ginkumpirmar man sa mga nakasaksi.
