Pila ka mga aktibidades ang patigayunon sang 79th Infantry Battalion sang Philippine Army kadungan sang ila nga ika-20 nga anibersaryo sa Agusto 16.
Sa interview sang Bombo Radyo Bacolod, ginpahayag ni 1st Lt. Fevie Fajardo, Civil Military Operations Officer sang 79th Infantry Battalion, nga may mga pre-anniversary activities sa una tubtub ikaduha nga semana sang Agusto.
Isa na diri ang Masaligan art contest nga pasakupan sang mga pamatan-on ukon estudyante kun sa diin magahimo sila sang artwork sa one-whole illustration board gamit ang oil pastel.
Ang igapinta sang participant ang igabase sa tema nga: Masaligan Pinagbuklod na Tungkulin, Hinubog ng Kagitingan 20 taong Paglilingkod sa Bayan.
Ang artwork ang igapasa personal sang contestant sa opisina sang 79th IB sa Sagay City tubtub sa July 31 nga amo ang deadline.
Sa Agusto 1, iga-post ini sang 79th IB sa ila nga Facebook page bangud isa sa mga criteria sa judging amo ang reactions sang mga netizens.
Suno kay Fajardo, ang art contest ang paagi sang 79th IB agud nga mashowcase sang mga pamatan-on ang ila nga abilidad.
Sa Agusto 2, patigayunon naman ang Masaligan Fun Run nagikan sa Bacolod City Government Center tubtub sa The Upper East.
Ang mga runner ang magasabak sa 3K, 5K kag 10K category.
Suno kay Fajardo, may kawsa ang fun run bangud ang matipon nila ang gamiton sa outreach program sa malagyo nga mga komunidad nga nasakupan sang 79th IB.
