Nagaplano ang 7th placer sa September 2026 Social Workers Licensure Examination nga magtrabaho sa ahensya sang gobyerno ukon non-government organization subong nga may yara na ini sang lisensya.
Si Julian Mae Bico, residente sang Brgy. Palayog, Hinigaran, Negros Occidental kag naggraduate sa University of Negros Occidental-Recoletos ang nakakuha sang 92% rating.
Siya ang nagtapos sa kurso nga social work nga may latin honors nga Magna Cum Laude.
Sa interview sang Bombo Radyo Bacolod kay Bico, iya ginpahayag nga gintinguhaan niya nga makapasar sa pasinawan apang wala ini naglaom nga makasulod sa Top 10.
Antes nagkuha sang board, nagreview si Bico sa isa ka review center.
Magluwas sa pagreview, ginhanda man niya ang iya mental health kag balatyagon agud makarecover gilayon kun indi makapasar.
Siya ang nagkuha sang exam sang September 9, 10 kag 11 sa Cebu City.
Sang naggwa na ang resulta sang Setyembre 16 sang kaagahon, nakahibi si Bico sang nahibaluan nga siya ang 7th placer.
Ang iya abyan nga si Jobeth Escander, graduate man sa UNO-R, ang 8th placer sa rating nga 91.80%.
Nagpasalamat si Bico sa iya mga ginikanan kag sa tanan nga nagsuporta sa iya sa iya nga journey.
Si Bico ang SK chairperson sang Brgy. Palayog, Hinigaran gani nagpasalamat ini sa ila nga Barangay Council sa pag-intindi sa iya.
Nagpalab-ot man ini sang pagpanginbulahan sa kaangay niya nga examinees kag nagalaom nga makaserbisyo sila sa mga pigado kag kabataan gamit ang ila noble profession.
Si Bico ang subang sa duha ka mag-utod.
Ang iya iloy ang nagatrabaho sa munisipyo sang Hinigaran samtang ang iya amay ang isa ka maestro sa high school.
