May walo ka mga police personnel nga nakadeploy sa Handumanan Public Cemetery agud maseguro nga wala sang may makasulod nga kontrabando subong nga tigkalalag.
Sa interview sang Bombo Radyo Bacolod kay Police Captain Glenn Montaño, station commander sang Bacolod Police Station 10, aga pa ini nagpadulong sa sementeryo agud tsekyaron ang sitwasyon.
Ini ang nagbutang sang apat ka pulis sa entrance agud magtsekyar sa mga dala sang mga magabisita sa ila minatay.
Samtang may apat man nga yara sa sulod nga nagaroving.
Ini agud maseguro nga wala sang nakasulod nga kontrabando.
Suno kay Montaño, ginadumilian nga magdala sa sulod sang sementeryo sang mga bladed weapons, makahulubog nga ilimnon, mga makatuga sang distorbo kaangay sang speaker kasubong man ang baraha ukon pagpanahor.
Panugyan sang station commander nga magbisita sang temprano samtang indi pa tuman ka damo ang tawo, partikular na sa mga may hypertension kag likawan man ang magdala sang magagmay nga kabataan.
Abiso man sini nga likawan ang magdala sang dalagko nga mga bags agud indi mabudlayan kun madamo na sang mga magabisita sa patyo.
