Nakumpleto na sang walo ka miyembro sang Philippine Marine Corps (PMC) – Force Reconnaissance Group (FRG) ang Exercise Cambrian Patrol sang United Kingdom.
Nangin madinalag-on ang walo ka Marines matapos magpaidalom sa training nga ginalakipan sang pagsaka sa Cambrian Mountains sa sulod lamang sang 48 ka oras samtang dululungan nga ginahimo ang pila ka mga complex military task.
Magluwas diri, nagpaidalom man ang mga Marines sa nagkalain-lain nga aspeto sang pagkasuldado kaangay lamang sang navigation, fieldcraft, marksmanship, casualty evacuation kag military knowledge.
Nagserbe nga nagapanguna nga venue subong nga tuig ang Black Mountains kag Sennybridge Training Area sa Wales.
Ang Exercise Cambrian Patrol ang ginakonsiderar nga isa sa mga pinakamabudlay nga military excercise sa bug-os nga kalibutan kun sa diin ang mga elite troops lamang ang nagpakigbahin.
Gindayaw naman ni Philippine Marine Corps (PMC) Commandant Maj. Gen. Arturo Rojas ang walo ka mga Marines sa madinalag-on nga military training kaupod ang iban pa nga elite nga mga suldado sa bug-os nga kalibutan.
