Kapin walo ka mga tawo ang missing kag padayon nga ginapangita matapos nga natiphag ang duta sa isa ka village sa Hunan, central China, kahapon, Domingo.
Apektado sang landslide ang apat ka balay sa village sa Douxi sa Xinhuang Dong Autonomous County sa Huaihua kahapon.
Sa karun, walo ka mga indibidwal ang nadula samtang ang iban nga mga residente ang natigayon nga maevacuate sang mga rescue officials sa hilway nga lugar.
Samtang, nagtupa ang madamol kag mabaskog nga ulan sa pila ka bahin sang China sang tinalikdan nga semana kun sa diin nagpagwa ang mga opisyales sang yellow alert kahapon para sa madamol nga pag-ulan kalakip na ang Hunan.
Sang Sabado, ginpahayag sang mga Chinese authorities nga nakita sang mga ini ang anum ka bangkay matapos nga namissing sang tinalikdan nga semana sa tion sang landslides nga tuga sang lapnagon nga pag-ulan sa southeastern province sang Fujian.
Nagtupa man ang madamol nga ulan sa southern China kadungan sang temprano pa nga pag-umpisa sang tuigan nga flooding season.
Kapin 47 man ka mga tawo ang napatay sa southern Guangdong province sang China kun sa diin ang madamol kag mamunog nga pag-ulan ang nagtuga sang pagbaha kag mudslides nga naghalit sa linibo ka mga balay kag nagguba man sang mga dalan kag pananum.
