Pila sa mga ginhiglight sang alkalde sa syudad sang Bacolod sa 100 days speech sini ang 8 point agenda sini.
Isa sa ginhighlight ni Bacolod City Mayor Alfredo “Albee” Benitez sa 100 days speech ang pagpagwa sang Executive No.1 sa pag-establisyar sang Good Governance Committee agud masiguro ang husto kag proper documentation sang transaction sang opisina sang gobyerno ilabi na ang disbursement kag liquidation sang public funds.
Suno pa sa alkalde ang pagpangita nila sang kamatuoran ang pagsiguro nga ang kwarta sang tawo ang wala ginausikan kag gina-abusar.
Isa man sa nakita sang Good Governance Committee ang ginkunsumo nga gatong nga ginbakal sang syudad sa tion sang anay administrasyon para sa tatlo ka bulan ang nagdangat sa 17,300 liters fuel samtang ang sa karun nga administrasyon ang nagbakal lamang sang 9000 ka litro sang gatong nga wala pa maubos sa tatlo ka bulan nga paggamit.
Samtang, ginhimo man sang administrasyon sini ang commitment nga tinluan ang imahe sang syudad, gani naghuman sila sang Bacolod City Task Force on Spaghetti Wires nga naghimos sang mga nagalambod nga mga kable sang kuryente kasubong man sang mga Telecom wires.
Paagi sa close coordination sa telecommunication companies kag ceneco, gin-umpisahan gilayon ang pagtrabaho sa clearing sang kabug-usan nga 30.53 tons sang spaghetti wires sa dalagko nga mga dalan sa syudad kag ini ang gin-umpisahan sang Hulyo 16.
Ang mga kable nga natipon ang gindonar sa mga vegetable farmers sa Barangay Alangilan kag iban pa nga mga beneficiaries agud gamiton sa vegetable production.
Nagaplano naman ang syudad nga magdihon sang resolusyon kaupod kay Bacolod City Councilor Al Victor Espino para sa long term solution sa problema sa spaghetti wires nga ibutang underground.
