Nagdangat sa 80 ang narekober nga bangkay samtang 32 naman ang nakaluwas matapos ginpalugdang sang US Submarine ang Iranian Warship sa Indian Ocean sang Martes, Marso 3.
Suno kay Hegseth, naiguan sang torpedo ang nasambit nga warship nga nagtuga sang paglugdang sini nga wala nabatyagan sang iban.
Wala ginhingadlan ang ginatumod nga barko apang nagwa ang iya pahayag matapos ang report gikan sa Sri Lanka tuhoy sa isa ka Iranian vessel nga ginatawag Iris Dena nga naglugdang malapit sa nabagatnan nga bahin sang ila baybayon.
Santo sa impormasyon sang Sri Lankan Navy, nagluntad ang insidente mga 40 kilometros humalin sa ila nga coastline.
Ginabanta nga yara sa 180 ang kabug-usan nga sakay sang barko.
Ginpahayag ni Sri Lankan Foreign Affairs Minister Vijitha Herath nga ang mga nakaluwas ang yara sa kritikal nga kondisyon kag gilayon man nga gindala sa ospital sa Galle agud madapatan sang pagulong.
Ang Iris Dena nga ginlunsar sang 2015, ang kabahin sang Southern Fleet sang Iran kag masami nga ginapadala sa mga operasyon sa ‘Strait of Hormuz’ kag ‘Gulf of Oman’.
Natabo ang insidente sa tunga sang nagapadayon nga pagbayluhanay sang opensiba sa tunga sang Estados Unidos, Israel kag Iran.
Sa pihak nga bahin, may mga bag-o nga pag-atake nga gina-angot sa Iran nga gin-report sa Saudi Arabia kag Kuwait, samtang ginpahayag sang Turkey nga napunggan sang “NATO air defenses” ang isa ka missile nga nagpadulong sa ila nga teritoryo.
