Patay ang 84 anyos nga babayi sa pagkasunog sang ancestral house sa Purok 6, Brgy Talubangi, Kabankalan City.
Ang biktima ang ginkilala nga si Delfa Ruiz, tag-iya sang balay.
Sa interview sang Bombo Radyo Bacolod kay Fire Officer 2 Villaruz, chief of operation sang Bureau of Fire Protection – Kabankalan City, lima sila ang magkaupod sa balay kalakip ang mga kabataan kag umagad sang senior citizen.
Apang yara sa ikaduha nga panalgan ang tigulang, nga indi na masulod bangod sa madasig nga pagdako sang kalayo gani ini ang wala masalbar.
Dugang pa nga indi naman maayo makalakat ang senior citizen bangod sa edad.
Suno kay Villaruz, 40 tubtob 70 anyos na ang ancestral house, kag ini ang concrete sa idalom apang human sa kahoy ang ibabaw gani madasig nga ginlamon sang kalayo.
Sa karun padayun pa ang imbestigasyon sang Kabankalan City Fire Station sa rasun sang sunog.
