Patay ang 84-anyos nga manughilot nga lalaki matapos ginbuno sang makapila ka beses sang duha ka wala makilal-an nga mga indibidwal sa ila nga puluy-an sa Don Hermino Village, Barangay 1, E.B. Magalona, pasado alas-4:00 sang kaagahon, Agosto 19.
Sa interview sang Bombo Radyo Bacolod kay Police Master Sergeant Henry Mangana III, investigator on case sang EB Magalona Municipal Police Station, nagakatulog ang biktima nga si Bonifacio Dequit kag ang iya asawa nga si Virginia Dequit sang may nagsulod sa ila balay nga duha ka lalaki, lunsay nagasuksok sang bonet.
Ginbuno sang mga suspek ang biktima sang makapila ka beses sa nagkalain-lain nga bahin sang iya lawas.
Nakaangkon man sang mga pilas ang asawa sa pagpamugong.
Gilayon nagpalagyo ang mga suspek sakay sa tricycle suno sa nakakita.
Ginhingagaw pa dala ang biktima sa ospital apang gindekalarar nga dead on arrival.
