Arestado ang 9 ka mga persona kasunod sa pag-serbe sang search warrant sang Philippine Drug Enforcement Unit -Negros Occidental sini lang nga hapon sa Prk Cagaycay, Barangay 2 cuidad sang Bacolod.
Sa interview sang Bombo Radyo Bacolod sa team leader nga si PDEA agent “alias Tagoto”, ginpahayag sini nga madugay na nila gina-monitor ang subject nga si Mary Grace Tupaz kag may yara sila sang mapag-on nga ebidensya nga ini ang nagagamit.
Suno kay Tagoto, pila na ka mga transaksyon ang ila gin-patigayon kag ginakuhaan sang patago nga laragway si Tupaz, antes sila nag-serbe sang search warrant.
Dugang pa sini, ang puluy-an nga gina-tiniran ni Tupaz ang ginahimo nga drug den.
Kag kun may yara sang kustomer, gina-pabayad sini sang tig-P20 pesos ang kada isa agud sa sulod sang balay mag-suyop sang iligal nga droga.
Masami naman sini nga mga kostumer amo ang mga driver sang trisikad, motorsiklo, kag mga tambay.
Ginkilala naman ang mga upod sini nga kanday, Joan Cañete; Melissa Lubunan; Bernardo Francia; Jerry Igalangga; Reymark Sombilla; Bryan Artus; Jundi Abaw; kag Steve Bachoco.
Magluwas sa mga nag-kaladakpan, may yara pa suno kay Tagoto nga mga naka-palagyo.
Nakuha naman sa paghinakop sang mga suspetsado ang isa ka sulpak, apang padayon pa sa gihapon ang inventory sang mga otoridad.
