91 ka bag-o nga kaso sang coronavirus disease 2019 ang narekord sa Western Visayas kahapon.
Sa ginpagwa nga COVID-19 Bulletin No. 108 sang Department of Health, ang probinsya sang Iloilo ang may pinakamadamo nga kaso bangud nakarekord ini sang 67; ginsundan sang Negros Occidental nga may yara sang 13; walo sa ciudad sang Bacolod; duha sa probinsya sang Guimaras; kag isa sa Iloilo City.
Ang mga residente sang Negros Occidental nga nagpositibo sa virus ang ginalakipan sang isa ka 58-anyos nga babaye nagikan sa isa ka 38-anyos nga babaye nga nagikan sa San Carlos City; 27-anyos nga lalaki nagikan sa Sipalay City; isa ka 26-anyos nga babaye nagikan sa banwa sang Cauayan; 26-anyos nga lalaki nagikan sa Hinobaan; apat ka tuig nga lalaki nagikan sa ciudad sang Talisay; 52 anyos nga babaye nagikan sa banwa sang Manapla; 60 antos nga lalaki kag 28 anyos nga babaye nagikan sa Calatrava; 54 anyos nga lalaki nagikan sa Sagay City; 15 anyos nga babaye nga residente sang Calatrava; kag 28 anyos nga babaye nagikan sa Cauayan.
Ang mga ini ang lunsay mga locally stranded individuals kag overseas Filipino workers kag yara sa karun sa mga quarantine facility.
Naka-admit naman sa isa ka balaybulungan ang isa ka 58 anyos nga babaye nga nagikan sa Bago City samtang yara sa quarantine facility ang isa ka 46 anyos nga lalaki nagikan sa ciudad sang Victorias.
Lunsay local cases ang duha.
Samtang, ang mga nagpositibo sa ciudad sang Bacolod nga mga LSI kag OFW ang ginalakipan sang isa ka 69 anyos nga lalaki; 23 anyos nga babaye; 33 anyos nga babaye; 47 anyos nga babaye; 32 anyos nga babaye; kag 36 anyos nga lalaki.
Sa karun, yara ang mga ini sa quarantine facilities.
Duha man ka local cases ang narekord sa ciudad nga ginalakipan sang isa ka 23-anyos nga babaye nga yara sa quarantine facility kag 29 anyos nga lalaki nga naka-admit sa isa ka balay-bululngan.
Sa karun, may yara na sang 184 ka kabug-usan nga kaso sang COVID-19 sa Negros Occidental samtang 61 naman sa ciudad sang Bacolod.
Sa bilog nga Western Visayas, nagdangat na sa 552 ang kabug-usan nga kaso, 363 ang active cases, 178 ang nakarecover kag nagapabilin sa 11 ang patay.
