Ang mga senior citizen ang ginakabig nga high risk kag vulnerable sa coronavirus disease.
Apang isa ka 92-anyos nga babaye nagikan sa ciudad sang Himamaylan diri sa Negros Occidental ang nag-ayo sa nasambit nga balatian.
Si Antonita Gargoles ang ginakabig sa karun nga pinakatigulang nga pasyente sa probinsya nga nag-ayo sa COVID-19.
Suno sa rural health physician sang Himamaylan nga si Dr. Kaye Marie Yap, Hulyo 23 sang magpositibo sa COVID-19 si Lola Antonita.
Suno kay Yap, ulihi nila nga ginbisita si Lola Antonita sang Agosto 6 matapos ang iya 14-day quarantine kag sadto, nagapangluya pa ini, nagasuper sang hilanat kag nabudlayan magginhawa.
Nahibaluan nga magluwas sa COVID-19, may yara man sang Chronic Obstructive Pulmonary Disease ang 92-anyos nga lola.
Bangud sa indi luyag sang mga himata sini nga dal-on siya sa ospital, ang lokal nga gobyerno kag Rural Health Unit na mismo ang nagadala sang mga bulong ni Lola Antonita sa ila nga puluy-an.
Mapisan man ini nga mag-inom sang mga bulong sa bulig sang iya mga kabataan kag apo.
Matapos ang duha ka adlaw nga pag-inom sang bulong, suno kay Yap, nagmayo ang pamatyagan ni Lola Antonita.
Matapos ang pila ka adlaw, nadula naman ang iya hilanat kag kabudlayan sang pagginhawa sa ka liwat nga pagswab test kay Lola, nagnegatibo na ini sa COVID-19.
Ginakabig sang doktor nga isa ka inspirasyon si Lola Antonita bangud apisar sang iya nga edad, nasarangan sini nga mabatuan ang makamamatay nga virus.
Ginpasalamatan kag ginsaluduhan ni Himamaylan City Mayor Raymund Tongson ang pag-ayo ni Lola Antonita nga suno sa iya, naghatag sang paglaom kag kusog sa kadam-an, ilabi na sa mga frontliners sa tunga sang pandemic.
