As of 5:00 kahapon sang hapon, nagdangat sa 947 families ukon 2,333 ka mga evacuees ang narecord nga yara sa evacuation center sa probinsya sang Negros Occidental kasunod sa paglaslas sang Bagyo Inday.
Ini ang nagikan sa Bago City, San Enrique, Pontevedra, La Carlota City, La Castellana, Moises Padilla, Isabela, Sipalay City kag Hinobaan.
May 17 ka panimalay naman ang partially damaged kun sa diin siyam diri ang nagikan sa Sipalay City kag walo naman sa banwa sang Hinobaan.
Sa interview sang Bombo Radyo Bacolod kay Irene Belle Ploteña, Head sang Negros Occidental Provincial Disaster Risk Reduction Management Office, ginpahayag sini nga yara sa gihapon sa evacuation center ang pila ka mga evacuees apisar nga nakagwa na Philippine Area of Responsibilty (PAR) ang Bagyo Inday bangud napaidalom sa gihapon ang probinsya sa Yellow Rainfall Warning.
Suno kay Plotena, nagkoordinar naman ang mga LGU kasubong man ang Provincial Government sa DSWD sa paghatag sang food packs kag assistance sa mga evacuees.
Dugang pa, may reported nga mga pagbaha sa pila ka mga LGU lakip na diri ang Isabela, Moises Padilla kag La Castellena apang gilayon naman ini nga nagsubside.
Panugyan sini sa mga pumuluyo ilabi na sa yara sa low lying areas kag flood prone areas nga mag-monitor sa weather update agud makahibalo kun ano ang sitwasyon sa tiyempo.
Panugyan man sini nga maghanda sang go to bag kag magsunod sa abiso sang LGU para sa kaluwasan sang tanan.
