BACOLOD CITY — Pila ka adlaw matapos ang tuyo nga pagpanghimulos sa isa ka dalaga, masanag na kun gab-i ang overpass sa dalan Lacson, Barangay Mandalagan, ciudad sang Bacolod.
Humalin Sabado sang gab-i, nagsiga na ang suga sa overpass sa tadlong sang isa ka mall.
Tatlo ka mga fluorescent lamps ang ginbutang sa lugar.
Madumduman nga sang Lunes sang gab-i, gintuyo nga himuslan sa overpass ang 18-anyos nga dalaga nga crew sang isa ka fastfood chain.
Papauli na kuntani ang biktima halin sa iya trabaho pasado alas 9:00 sang gab-i apang ginbalabagan ini sang mga suspetsado sang siya ang naglabay sa overpass.
Isa sa mga suspetsado ang naka-briefs gid lamang samtang ang isa ang wala na sang pang-ibabaw nga panapton.
Gintinguhaan sang mga ini nga buksan ang pang-ibabaw nga bayo sang dalaga apang nagbato ini kag iya gintindakan ang mga suspetsado rason nga siya ang nakapalagyo.
Kasunod sang insidente, gilayon nga nag-untat sa pagtrabaho ang biktima bangud sa trauma.
Tubtub subong, wala pa gid natumod ang duha ka mga lalaki.
