Ginpasalig sang alkalde sang La Castellana, Negros Occidental nga indi mabudlay nga ilock down ang Barangay Nato kun sa diin nagaistar ang driver nga nagpositibo sa COVID 19.
Sa interview sang Bombo Radyo Bacolod kay Mayor Rhumyla Nicor-Mangilimutan, ginapahayag sini nga naka-seal off na ang Barangay Nato kun sa diin wala na sang makasulod kag makagwa diri.
Nagpangayo man ini sang augmentation sang pulis kag Philippine Army kun sa diin may yara na sang nakadeploy agud magbantay sang border sa Barangay Robles kag Talaptap.
Ginpahayag man sini nga ang Barangay Health Emergency Response Team (BHERTZ) kag mga barangay officials ang magafacilitate sang kinahanglanon sang mga pumuluyo sa barangay.
Ginpanugyanan man sang alkalde ang pasyente nga magpakaisog bangud kun madepress ini, mas naganubo ang immune system kun sa diin mahimo tunaan sang paglala sang kondisyon sini.
Nakita man sang alkalde nga yara na sa maayo nga kondisyon ang 43-anyos nga driver.
Ginkuhaan naman sang ikaduha nga swab sample ang pamilya sini nga ginalauman sang alkalde nga magnegatibo na.
Samtang, nagpanugyan man ang alkalde sa mga pumuluyo nga sundon ang tanan nga ginapatuman nga pagsulundan agud indi na magdugay ang ginapangatubang nga health crisis.
