Nabaton na sang isa ka pamilya sa Victorias City, Negros Occidental ang kamatayon sang isa ka miyembro sini nga yara sa karon sa Quezon City bangud sa coronavirus disease 2019.
Sa interview sang Bombo Radyo Bacolod kay Charisse, manghod sang napatay nga si Toto, ginpahayag sini nga wala nagpanugid ang iya magulang sang matuod niya nga ginabatyag apisar nga may yara ini sang ubo.
Ginpanugyanan ini sang iya mga utod nga magpacheck-up ukon magpaadmit bangud ginasuspetsuhan na ini sang iya mga utod nga infected ini sang coronavirus.
Abril 15 sang nagpakonsulta ang biktima kag Abril 16 ini naadmit.
Ginkuha lamang ini sang personnel sang Quezon City General Hospital sa balay sang iya utod kag wala man sang nakaupod bangud highly contagious ang masakit kag santo man sa protocol sang Department of Heath angot sa pag-atender sa COVID-19 patient.
Wala na ni natabangan bangud nalikupan na sang virus ang lawas sini kag madamo na ang nangin komplikasyon sang masakit.
Naestorya niya pa ang biktima apisar nga ginala-ot na lamang sini ang iya pagginhawa apang sang Abril 18 sang hapon, nagtaliwan si Toto.
Nasubuan ang pamilya sini bangud isa lang ang biktima sang ini ang nahospitalize.
Wala man sang ginbayaran ang pamilya sa ospital kag sa pagpacremate sa bangkay.
Hulaton na lamang sang mga ini nga matapos ang ECQ kag magbalik ang pagbiyahe agud makuha ang abo sang ila napatay nga utod.
Ginquarantine man gilayon ang utod sini nga nakaupod sang biktima kag ginkuhaan sang swab sample kag ginahulat pa ang resulta.
Nagpanugyan man ini sa publiko nga kun may nabatyagan nga malain, ituad na ini agud indi magpareho sa natabo sa utod sini.
Wala man nakahibalo ang pamilya kun paano ini nalatan sang nagtinir ini sa iya utod sa Quezon City.
